Formúlan er lögð af stað á ný og að venju var það Schumacher sem sigraði. Þar sem minn maður, Hakkinen, er hættur og farinn að snúa sér að barnauppeldi eða Guð má vita hverju, þá verð ég að finna mér einhverja aðra til að halda með. Ég hugsa að ég haldi mig við McLaren-liðið og haldi með Coulthard og Raikkonen.
En íslensku gúbbarnir hjá Ríkissjónvarpinu sem lýsa Formúlunni, þeir eru sko ekki í náðinni hjá mér. Bullið úr þeim er alveg merkilegt, þeir vita sjaldnast hvað þeir eru að segja og þurfa að leiðrétta sig á fimm mínútna fresti. Það fer líka mjög í taugarnar á mér hvað þeir tala lélega íslensku og hvað orðaforði þeirra er lélegur. Þeir tala stanslaust um að þessi eða hinn ökumaðurinn sé að "gera góða hluti". Hvernig væri að segja að einhver "standi sig vel", "sýni frábæran akstur" o.s.frv.? Ég legg til að íslenska þjóðin slái saman í íslenskunámskeið fyrir þessa gutta.