Í kvöld var saumaklúbbur hjá Önnu Margréti í D-bekknum. Eins og alltaf var frábært að hitta fyrrum bekkjarfélagana, borða á sig gat og missa heyrnina vegna hávaðans í kjaftavaðlinum í okkur. Svo ég skjóti því nú inn hérna, þá er ég mjög stolt af okkur fyrrum D-bekkingum fyrir hvað við erum dugleg að hittast, eða ætti ég að segja duglegar...strákarnir okkar tveir eru því miður ekki nógu duglegir að láta sjá sig.
Sem sagt, ég ákvað að koma með eitthvað sætt og fitandi og datt í hug að gera Geirakökurnar en þær eru aðalsmákökurnar sem ég baka. En það var eitthvað bjánalegt að fara að baka smákökur í janúar og ákvað ég því í samráði við "Neyðarlínu eldhússins" (þ.e. mömmu) að breyta uppskriftinni og baka köku úr henni í staðinn. Þar sem mér fannst heill bolli af sykri ekki gera þetta nógu sætt ákvað ég að skella M&M og lakkrís út í :P Þetta heppnaðist allt alveg ágætlega og úr varð Sælgætiskaka Sigurrósar.