Sól og sumar í dag :) Ákaflega ljúft! Og ekki skemmir það fyrir að það skuli vera komin helgi, og það m.a.s. Eurovision-helgi! Ekki slæmt það! Ég þarf einmitt að henda einhverju ofan í tösku á eftir því í fyrramálið dríf ég mig af stað í Eurovision-partý á Selfossi. Ég vona bara að mamma láti okkur ekki horfa á keppnina úti á sólpalli. Mér skilst nefnilega að frúin vilji helst bara sitja úti á nýja fína pallinum þessa dagana, sama hvernig viðrar - hún reynir að telja mér trú um að það sé alltaf sól á Selfossi þessa dagana...! ;)

Fór ásamt Elísabetu lengst upp í sveit (að mér fannst) í grillveisluna á setrinu hans Magga megabílstjóra. Já, á setrinu hans Magga því Maggi býr nefnilega á setri. Þvílíkt hús! Hátt til lofts og vítt til veggja, risapallur og síðast en ekki síst hesthús með átta hestum.
     Maggi var rausnarlegur. Maturinn hefði getað mettað þúsundirnar og vínið flæddi líkt og frelsarinn sjálfur stæði sveittur inni í eldhúsi við að umbreyta kranavatninu. Ég var reyndar á bíl svo ég lét mér duga Sprite.
     Eitthvað var Maggi svekktur yfir því að ég skuli hafa stungið hann af í sumar. Hver eigi nú að senda honum transfer- og pickupföx með aulahúmor, "góðlátlegu" gríni og teiknuðum myndum af sólum og langferðabílum?!? En hann lifir þetta nú vonandi af ;)