Fór til tannlæknisins míns í dag. Úff, þetta er ekki það skemmtilegasta sem ég geri, þó tannlæknirinn minn sé dúndurfínn kall þá bara finnst mér ekkert gaman að láta meiða tennurnar mínar. Sem betur fer voru engar skemmdir og eftir að hafa gapað vel til að leyfa honum að rífa upp tannholdið bakvið neðri tanngarðinn fékk ég að fara heim. Hef reyndar engin verðlaun fengið í mörg ár fyrir að vera dugleg hjá tannlækninum. Mér finnst hálfgert svindl að fá ekki lengur að velja mér hringa og plastarmbönd úr verðlaunakörfunni bara af því ég er orðin sjálfráða... ;) Held ég fari fram á að mega borga pínu extra næst og fá í staðinn að velja mér verðlaun.

Settist niður með fartölvuna og skannann fyrir framan sjónvarpið í kvöld til að skanna inn nokkrar myndir meðan ég horfði á upptökuna af Boston Public frá því í gær. Það eru því komnar inn myndir af niðjamóti föðurættarinnar minnar árið 1994 og nokkrar aðrar gamlar og góðar myndir :) Svo gleymdi ég mér alveg í gömlu albúmunum og endurraðaði í þrjú elstu 200-mynda albúmin mín. Tók Laugalækjarskólamyndir til hliðar til að setja í séralbúm, rétt eins og ég gerði við Laugarnesskólamyndirnar. Það eru enn myndir liggjandi á sófaborðinu inni en nú verð ég að fara að koma mér í háttinn.