Ég sagði mömmu í símanum áðan að það væri nú bara smávegis snjólag hérna í Reykjavík, annað en á Selfossi... en uppgötvaði það nú þegar ég skrapp út í búð áðan að það var aðeins meiri snjór en ég hélt. Samt ekkert á við snjóskrímslið sem kom rétt fyrir áramót en samt nóg til að ég hálffesti bílinn á leiðinni út úr innkeyrslunni okkar. Náði sem betur fer að losa mig og komast út á götu og festi mig ekki meir. Þurfti reyndar að koma við uppi í skóla og þorði ekki að leggja í vanalegu kennarastæðin þar sem þau voru ískyggilega snjóþung. Lagði því næstum úti við Háuhlíð og gekk restina af leiðinni.

Til að vera ekki öðruvísi en öll íslenska þjóðin "horfðum" við á Idol í gær. Reyndar byrjuðum við bara að horfa í seinni umferð og reyndar erum við með stöð tvö ruglaða svo við fengum bara hljóðið óbrenglað en þetta var samt ágætt. Ég held það sé engin spurning að besti þátttakandinn vann, hefur skarað algjörlega fram úr í þessum þremur keppnum sem ég hef séð.

Fram að Idolinu horfðum við á American Wedding sem við áttum alltaf eftir að sjá. Virkilega neyðarleg en bráðfyndin.

Nú er helgin framundan og ég ætla að einbeita mér að tvennu:
A) gera heimili okkar sætt og fínt.
B) losa mig við milljónasta kvefið mitt fyrir mánudaginn.