Kennarar fjölmenntu á Austurvöll í dag til að minna þingmenn á yfirstandandi verkfall og ábyrgð ríkisins. Þarna voru einnig samankomnir trúleysingjar á vegum Vantrúar sem buðu þingmönnum upp á skyr. Þetta er bara farið að vera daglegt brauð hjá manni að arka milli mikilvægra staða og vekja ráðamenn til umhugsunar. Það veitir heldur ekki af!

Helstu fréttir af vinstri höndinni eru að hún virðist vera örlítið að skána. Ég tók límvafningana af henni í morgun þar sem þeir voru að verða slappir og hef komið fram við hana eins og prinsessu í allan dag. Ég er viss um að engin önnur hönd fær svona mikla þjónustu ;) Nú þegar líður á kvöldið er hún að versna aftur en vonandi er þetta samt á réttri leið. Heimilislæknirinn minn ætlar svo að senda mig í myndatöku í næstu viku og þá kemst ég kannski að því hvaða dularfullu krampar og verkir þetta eru.

Herdís hringdi í mig áðan frá The Dominion Theatre við Tottenham Court Road í London til að leyfa mér að heyra í Queen-showinu sem hún er á þessa stundina. Mögnuð upplifun að fá smá brot beint í æð hingað heim á Frón - og mikið rosalega væri ég til í að vera þarna með henni :)