Þetta hefur verið nokkuð róleg verslunarmannahelgi hjá okkur Betrabólsbúum.

Á föstudeginum vöknuðum við reyndar eldsnemma og stukkum út til að kippa inn grillinu okkar sem virtist ætla að fljúga af stað. Þurfum endilega að græja festingar og nýja ábreiðu á það, þessi ábreiða virkar vel sem segl eða vængir og hjálpar grillinu því miður við að taka flugið. Föstudagurinn sjálfur fór ekki í neitt merkilegt, var hálfsyfjuð og ómöguleg allan daginn eftir að hafa vaknað of snemma.

Laugardagurinn var ekki mikið merkilegri, þvoði þvotta og þreif íbúðina. Um kvöldið skelltum við skötuhjúin okkur í bíó og sáum Shrek 2. Það var búið að hlaða á okkur sögum af snilld þessarar myndar og við fórum því kannski með nokkrar væntingar í pokahorninu. Myndin var stórskemmtileg en sló engan veginn út fyrri myndina og eins og Jói segir í sinni færslu þá voru engin atriði sem ollu hláturskast, mesta lagi brosi og léttu flissi.

Í dag var leiðinni hins vegar heitið á Selfoss þar sem við hjálpuðum Guðbjörgu og Magnúsi við að mála nýja heimilið þeirra. Eftir virkilega góða sunnudagssteik hjá mömmu héldum við heim á leið og svaf ég meirihluta leiðarinnar. Eyddi restinni af kvöldinu í að snurfusa vinnuaðstöðuna mína, þetta er smám saman að taka á sig almennilega mynd. Náði svo núna rétt fyrir svefninn einum John Doe þætti. Ég virðist alltaf lenda á endursýningunum sem er svo sem allt í lagi. Hentar mér líklega betur heldur en föstudagskvöldin (sem Steinunn og sonur voru svo vinsamleg að benda mér á :)) Ég á nefnilega mjög erfitt með að festa mig yfir sjónvarpsþáttum á föstudagskvöldum - þó ég sé reyndar sjaldnast að gera neitt sérstakt þá.