Ég sit í afmælisteymi Hlíðaskóla en við vinnum að því að skipuleggja ýmsa skemmtilega atburði í tilefni 50 ára afmælis skólans. Í dag var svaka afmælishátíð með nemendum og starfsfólki. Allir skreyttu hurðirnar að stofunum sínum og stofurnar líka, skólinn bauð upp á alvöru heitt súkkulaði og smákökur en síðan flökkuðu krakkarnir milli stofa og heimsóttu vini, systkini og aðra skólafélaga. Í hverri stofu var boðið upp á þraut eða verkefni og allir skemmtu sér konunglega.

Við í 3. SJO vorum með tvær getraunir í okkar stofu. Annars vegar átti að giska á hvað væru mörg filmubox í turni sem krakkarnir röðuðu upp um morguninn og hins vegar vorum við með dularfullar myndir í PowerPoint-sýningu en gestirnir áttu að reyna að finna út hverju myndirnar væru af.

Hátíðin gekk svo vel að við í afmælisnefndinni brostum hringinn í allan dag. Það er oft erfitt að skipuleggja eitthvað sem brýtur alveg upp skólastarfið og stundum erfitt að sannfæra alla um að hugmyndirnar sem maður fær geti alveg virkað. En í þessu tilviki gekk allt frábærlega og við erum ákaflega stoltar af afmælishátíðinni okkar!

Myndir af hátíðinni eru væntanlegar inn á netið :)