Hið árlega kórpartý Hlíðaskólakórsins var haldið með pompi og prakt heima hjá Siggu yfirkórstjóra í dag. Kórinn skemmti sér að venju alveg stórvel, át á sig gat og allir fóru sáttir heim.

Við fórum m.a. í Twister,

hituðum upp fyrir HM með nokkrum þrusumörkum

hengdum nótur á kórstjórana,

fórum í Fram, fram fylking

og borðuðum pizzur og frostpinna.

Sem sagt, einstaklega vel heppnað kórpartý og við getum strax farið að hlakka til næsta árs!

Við hjónakornin drifum okkur niður í Smáraskóla fyrir hádegi til að kjósa. Lentum ekki í neinni biðröð og smeygðum okkur hvort inn í sinn kjörklefann til að setja x á réttan stað.

Veit reyndar ekki hvort x-in okkar lentu bæði á sama stað en það skiptir nú engu máli :)

Þetta er hvort eð er allt sama tóbakið ;)

Nemandi minn einn er einmitt á þeirri skoðun. Hún hnippti í mig þegar hún var komin í sumarjakkann sinn til að fara út í frímínútur í gær og benti mér á barmmerkin sín tvö.

"Þetta eru þeir sem ég held með, Sigurrós!" tilkynnti hún mér ánægð.

Öðrum megin í jakkanum var barmmerki fyrir X-D og hinum megin var merki X-V.

Já, það er ágætt meðan þetta er allt svona einfalt ;)