Síðasta vetur dó blandarinn minn, sem hafði fram að því staðið sig vel í að tæta sundur appelsínur, perur, epli og fleiri ávexti svo ég gæti neytt þeirra í drykkjarformi. Ég bjóst svo sem ekki við margra ára endingu þar sem greyið var keypt í Bónus, en tæp tvö ár er nú kannski samt helst til stutt.

Í gær dreif ég mig í ELKO til að kaupa nýjan blandara. Starði til skiptis á Electrolux-blandara og einhvern annan sem ég man ekki merkið á og velti fyrir mér hvorn ég ætti að kaupa. Þeir kostuðu báðir það sama en hvor var eiginlega betri? Kostir Electrolux-blandarans voru stærri kanna, kraftmeiri mótor, sérstaklega hannaður til að geta líka bruðið klaka og er frá merki sem ég þekki. Kostir hins blandarans voru einkum þeir að hann var yfirgengilega flottur og mótor-hlutinn var glansandi rauður í stíl við KitchenAid-hrærivélina mína.

En, ég leyfði skynseminni að ráða og fór heim með Electroluxinn. Prófaði hann áðan og áttaði mig strax á því hvað gamli blandarinn minn var lélegur. Þessi er algjör draumur. Ég botna reyndar ekki alveg í leiðbeiningunum - þar stendur Do not operate the appliance with your hands bare. Þarf ég þá að sækja ullarhanskana í hvert skipti sem mig langar í Smoothie...?