Okkar Jóa bíður það verkefni nú á næstu dögum að fylla út alla nauðsynlega pappíra vegna komandi fæðingarorlofs. Ég hef þegar verið vöruð við því að þetta ferli sé einn alls herjar frumskógur og það sé endalaust af skjölum og vottorðum sem þurfi að redda héðan og þaðan.

Hins vegar kárnar nú heldur gamanið því nú er Fæðingarorlofssjóður víst fluttur á Hvammstanga . Spurning hvort þeir séu með opið um helgina ef við fáum okkur bíltúr norður... ;)

Eins gott að Íslandspóstur skuli enn vera starfræktur - eða hvað? Annars yrði þetta eins og í jólaguðspjallinu...

Það bar til um þessar mundir, að boð kom frá Fæðingarorlofssjóði, að öll fæðingarorlof skyldu skrásett á Hvammstanga. Þá fór og Jóhannes úr bænum Kópavogi, til Hvammstanga ásamt Sigurrós eiginkonu sinni sem þá var þunguð. En meðan þau voru þar, kom sá tími, er hún skyldi verða léttari.

Einhver sem veit stöðuna á gistiheimilum Hvammstanga...?

Þetta er nú engin alvöru færsla, vil bara koma með nokkrar smávægilegar tilkynningar :)

Tilkynning 1:
Jói er búinn að vera að prófa sig áfram með spamvarnir fyrir gestabókina og orðabelginn og gestabókin hefur nú verið opnuð aftur í prufuskyni. Elín er þegar búin að nýta tækifærið og skrifa inn nýárskveðju og nú er bara spurningin hvort fleiri ríða á vaðið? ;)

Tilkynning 2:
Stefa mín er komin með nýja heimasíðu og ætlar að rísa sem kröftugur fönix úr bloggösku síðasta árs. Hvet ykkur til að líta við á blogginu hennar, hún Stefa er svo skemmtileg :)

Tilkynning 3:
Ja, það var svo sem ekki fleira í bili - svo að textinn um "nokkrar" smávægilegar tilkynningar passar líklega ekki... Ekkert meira markvert að gerast fyrir utan það að Bumba litla stækkar og stækkar, sparkar og sparkar. Eiginlega kominn tími á næstu bumbumynd - reyni að redda því hið fyrsta og skelli svo einni hérna inn fyrir ykkur sem eruð ekki svo heppin að hitta mig reglulega ;)