Er búin að vera veik allan fyrri helming vikunnar og held ég sé núna loksins eitthvað að jafna mig. Fékk þessa skemmtilegu magapest sem er að ganga. Þar sem ég er með blóðþrýsting sem á frekar til að falla heldur en hitt þá líður yfirleitt yfir mig þegar ég fæ gubbupest og gerðist einmitt núna. Svo að Jói var skiljanlega heima til að sinnadóttur og veikri eiginkonu, enda kom að sjálfsögðu ekki til greina að ég svo mikið sem lyfti barninu í augnablik meðan það var hætta á að það liði aftur yfir mig. Ég lá því algjörlega rúmföst á mánudaginn og gat varla reist höfuð frá kodda. Jói skaust í apótek fyrir mig og ca. fimm mínútum áður en hann kom aftur fór Ragna Björk að hágráta og ég get sagt ykkur að það var ekki auðvelt að liggja við hliðina á grátandi barninu og geta nákvæmlega ekkert gert fyrir hana. Ég gat varla reist mig við til að stinga snuðinu aftur upp í hana. Ömurlegt!

En eins og ég segi þá er ég nú orðin ágæt núna. Þreytt, en mun betri.

Sólarglæta vikunnar var þó að ég fékk loks nýju Harry Potter bókina (en það er reyndar saga fyrir aðra færslu hvernig hún komst loks til skila!) og ég kláraði hana í dag. Ætla ekki að skrifa neitt um söguþráðinn þar sem mínir nánustu eru að lesa hana núna og ég vil ekki kjafta frá. Vil bara segja að bókin er góð. Verulega góð.