Ég veit að þetta hljómar undarlega, sérstaklega af því ég er svo mikil kuldaskræfa... en mér finnst yndislegt að hafa svona mikinn kulda núna svona alveg rétt fyrir jól. Það væri bara ekkert jólalegt ef það væri hlýtt! Ég fór í kirkjugarðana snemma í morgun því ég kemst ekki í fyrramálið. Það var yndislega rólegt bæði í Fossvogs- og Gufunesgarðinum og fimbulkuldinn setti alveg punktið yfir i-ið :) Það tilheyrir að vera með pikkfrosna fingur, tær, kinnar og nef þar sem maður bograr við að kveikja á friðarkerti fyrir framan leiðin :) Sem betur fer hafði ég ekki bara gaskveikjarann með heldur einnig eldspýtustokk því það kom á daginn að gasið var allt búið. Það var því smá svona "Litla-stúlkan-með-eldspýturnar"-fílingur hjá mér þegar mér loksins tókst að kveikja á kertinu eftir nokkrar eldspýtur ;)

Svo mátti ég til með að taka nokkrar myndir af jólahúsinu á Bústaðarveginum. Húrra fyrir Sigtryggi sem lét undan þrýstingi landans og setti upp jólaljósin eins og vanalega. Það var svo sorgleg tilhugsun að hann ætlaði ekki að skreyta. Hins vegar er það líka smá sorgleg tilhugsun að vita af pínu öldruðum herramanni prílandi upp á þaki. Vonandi skiptir hann um skoðun á næsta ári og samþykkir að leyfa einhverjum að setja þetta upp fyrir sig.

Hér eru myndir frá Litlu jólum D-bekkjarins síðasta laugardag. Ég tók nú ekki margar, þó við sætum langt fram eftir nóttu að kjafta :)

Hins vegar gleymdi ég alveg að taka myndir á Litlu jólum Klúbbsins í gær :( Og var meira að segja með myndavélina og allt. En það er kannski ágætt því þá sæist kannski hvað við föndruðum lítið... hehe ;)