Leiðin lá austur fyrir fjall í gær. Jón Ingi mágur mömmu varð sjötugur í gær og hélt upp á afmælið með mikilli tónlistarveislu í Tryggvaskála. Fjölmargir stigu í pontu og sögðu viðstöddum frá kynnum sínum af afmælisbarninu, 10 ára afastrákur sýndi glæsilegan dans, sunginn var fjöldasöngur og ýmsir tóku lagið og sungu einsöng, þ.á.m. voru söngkonan Kristjana Stefánsdóttir og einnig 8 ára gömul afastelpa. Glæsilegt afmæli í alla staði :)

Við Jói fengum svo húsaskjól hjá mömmu. Vöknuðum snemma og ætluðum að skella okkur í bakarí um níuleytið en komumst að því að Selfossbakaríin opna ekki fyrr en hálftíu :( En sem betur fer átti mamma kleinur handa okkur svo að við þurftum nú ekkert að svelta :) Keyrðum svo heim í höfuðborgina fyrir hádegi í góðu veðri.

Sigrún hjólaði svo til okkar úr Mosfellsbænum um tvöleytið. Sem betur fer hitti hún engan hund á leiðinni eins og í síðustu hjólaferð. Mikið innilega er ég sammála henni með að banna hundahald. Ég er svooooo langt frá því að vera dýramanneskja! En sem sagt, við Sigrún sátum úti á svölum í sólinni og kjöftuðum meðan Jói læknaði fartölvuna hennar af vírusum. Ég hjólaði svo með henni áleiðis tilbaka en sneri reyndar við nálægt Gnoðavogi og hjólaði eftir krókaleiðum aftur heim. Veit að þetta var nú ekkert sérlega langt en fyrsta hjólaferð ársins má heldur ekki gera út af við mann ;)

Það er býfluga á stærð við lítinn kanarífugl í glugganum á vinnuherberginu okkar! Við reyndum að koma henni út, en nú er hún búin að ná að hreiðra um sig í fellingu í blúndugardínunni. Ég vona bara að hún hafi ekki ákveðið að það sé góður staður til að gera sér bú... :S

Uppfært:
Oddný og Gísli litu við og fengu að sjá stóra býfuglinn okkar og veittu okkur hugrekki til að veiða veikburða kvikindið í stórt box. Þar trítlar hún nú um og bíður eftir að komast í náttúrugripasafnið mitt ;)

Uppfært enn á ný:
Og nú var Jói að veiða geitung í svefnherberginu okkar.
Mér er hætt að standa á sama... sumarið er greinilega komið!