Við mamma erum nú með sama manninn á bakinu. Og á hálsinum. Ég fór sem sagt í fyrsta skipti til sjúkraþjálfara í dag og fór að sjálfsögðu til þess besta í bænum, hans Jakobs, sjúkraþjálfarans hennar mömmu. Fer aftur á fimmtudaginn. Nú ætla ég líka að vera dugleg að sitja rétt og vera góð við bakið mitt svo það gefist örugglega ekki upp á mér.

Við Jói fórum loksins í bíó í kvöld. Við erum búin að vera á leiðinni í bíó í lengri tíma en höfum ekki komist út af kvefinu. Það vill enginn hafa síhóstandi og snýtandi fólk í bíó. En við erum að skána svo við drifum okkur í kvöld. Fórum á Spiderman 2 sem er virkilega góð. Heilmikil persónusköpun og samtöl og alveg passlega mikið af hasaratriðum. Mikið vorkenndi ég samt gelgjunum í bíósalnum sem sáu sig knúnar til að flissa eins og hýenur í hvert skipti sem eitthvert hjartnæmt atriði átti sér stað. Gelgjur mega nefnilega ekki sýna slíkar tilfinningar, þannig að varnarviðbrögðin (flissið ógurlega) eru sett í gang til að enginn sjái að þeim finnist óþægilegt að horfa á tilfinningaþrungnar senur. En þetta eldist nú vonandi af þeim... ;)