Fórum að sjá The Incredibles í gær. Besta orðið til að lýsa henni er líklega einmitt "incredible". Þetta er alveg stórkostleg mynd, fyndin, spennandi og grafíkin alveg mögnuð. Ég upplifði það sama og þegar ég sá Shrek, þ.e.a.s. mig langaði mest að fara beint aftur í miðasöluna þegar myndinni lauk, kaupa mér annan miða og sjá myndina strax aftur. Nú bíð ég bara spennt eftir að sjá hvort það kemur ekki örugglega mynd nr. 2 :)

Eitt sem mér fannst svolítið merkilegt. Við ætluðum að sjá hana í Háskólabíó til að geta séð hana í almennilegum sal. En þegar kom að okkur í miðasölunni komumst við að því að hún var í minnsta salnum sem er sá eini í húsinu sem er eins og kústaskápur. Við hættum snarlega við og drifum okkur yfir í Álfabakkann þar sem myndin var í stóra salnum niðri.
Hvernig stendur á því að mynd sem var frumsýnd fyrir 9 dögum er strax komin í minnsta salinn? Ég skil ekki alveg vinnubrögðin hjá bíókeðjunum, sama myndin er í hverju einasta bíói keðjunnar svo að úrvalið er varla neitt þegar velja á mynd og ef maður sér ekki myndina á fyrstu sýningarviku þá missir maður af því að sjá hana í sæmilegum sal og stuttu seinna eru þær bara hættar. Af hverju er ekki hægt að skipta þessu svolítið á milli bíóa?
Þar fyrir utan þá finnst mér að maður eigi ekki að þurfa að borga sama verð fyrir bíómiðann í kústaskápnum í Háskólabíó og í stóra salnum þeirra.