Hmmm...svona ferðir og aðrir stórir viðburðir verða alltaf til þess að leggja bloggið mitt í dvala. Maður hefði haldið að það væri nú öfugt, en einhvern veginn þá finnst mér alltaf að ég þurfi að skrifa svo rosalega mikið ef ég hef verið að gera eitthvað merkilegt að það endar yfirleitt með því að ég skrifa ekki neitt.

Ætla að reyna að láta þetta ekki gerast núna. Ætla bara að blogga um hversdagsleikann þar til Finnlandsmyndirnar koma inn og þá segi ég ykkur kannski eitthvað fleira skemmtilegt um Finnland :)

Helgin núna hefur hins vegar farið í tiltekt. Langaði til að taka almennilega til núna, þ.e.a.s. útbúa stað fyrir hvern hlut svo að hver hlutur geti verið á sínum stað. Fór í gegnum skrifborðsskúffurnar og henti óþarfa drasli, keypti fullt af litlum plastkössum fyrir föndurdótið og tvo stóra plastkassa til að geyma alla litlu plastkassana í.

Hef ég nokkurn tíma sagt ykkur frá þessari gífurlegu áráttu minni til að kaupa plastkassa? Ég hugsa að Rúmfatalagerinn færi einfaldlega á hausinn ef mín nyti ekki við, ég kem reglulega og kaupi fulla innkaupakerru af plastkössum, og það er eiginlega sama hvað ég kaupi mikið, mig vantar alltaf fleiri kassa.

Jú jú, það er alveg rétt hjá ykkur ég er óskaplega skrýtin, en það er líka þess vegna sem þið elskið mig ;)