Tengdaforeldrar mínir áttu báðir afmæli síðastliðinn þriðjudag. Við byrjuðum á því að fara í kaffiboð til tengdapabba og borðuðum þar góðar veitingar. Svo fórum við til tengdamömmu og borðuðum þar góðar veitingar. Það þarf því engan að undra að við komum pakksödd heim ;)

1. desember í dag eins og allir ættu að vera með á hreinu. Ég hengdi upp jólaseríur í skólastofunni - eina fyrir ofan töfluna og eina í glugganum. Ætla svo að koma með þá þriðju og skella á litlu rótarhnyðjuna okkar sem við höfum sem heilsárstré hjá okkur. Svo fá allir bekkir dagatalskerti inn til sín og ég kveikti á því í dag meðan við lásum nestissöguna. Litlu myrkrapúkarnir mínir eru hæstánægðir með þetta, en þau vilja helst bara hafa ljósin slökkt alla daga og hafa kósí stemmningu. Það er í lagi í nestistímum (þó ég hafi nú reyndar áhyggjur af því að þau sjái ekki nestið sitt) en ég hef nú loftljósin kveikt þegar þau eru að vinna.

Við Jói brugðum okkur svo í Hraunbæ í dag til að kaupa gervijólatré hjá Skátunum. Gott að hafa þetta tilbúið þegar jólin koma. Tréð fór beint niður í geymslu í fína kassanum sínum og nú þarf ég bara að muna að kaupa skraut og seríu á það - væri hálflummó ef það gleymdist... ;)