Krakkarnir í 3. bekk voru búnir að vinna sér inn verðlaun fyrir góða hegðun og við stuðskvísukennararnir ákváðum að bjóða upp á náttfatabíó í verðlaun!

Allir mættu á náttfötunum í skólann í dag, við komum okkur þægilega fyrir inni í salnum og horfðum á The Goonies á stóra sýningartjaldinu. Eftir hlé (hádegismatur og frímínútur) fengu svo allir popp og appelsínusvala.

Það þarf líklega ekki að taka fram að þetta sló þvílíkt í gegn! Veggirnir titruðu í hvert skipti sem hláturrokurnar komu frá náttfataklæddum áhorfendahópnum og ég skal alveg viðurkenna að það var ósköp kósí að sitja á náttfötunum inni í sal skólans og horfa á eina af mínum uppáhaldsbíómyndum á stóru tjaldi :)