Hið árlega Eurovision-partý Assa var haldið með pompi og prakt í gærkvöld. Ég skildi eftir brjóstamjólk í pela fyrir Rögnu Björk (sem hún drakk umorðalaust í einum teyg hjá pabba sínum) og dreif mig á partýsvæðið.

Eins og vanalega var mikið um dýrðir hjá partýkónginum, íbúðin glæsilega skreytt og stuðið mikið. Ég var nú sú eina sem mætti í þemalitunum (hvítt og blátt fyrir Finnland) sem gefnir höfðu verið upp svo að það lá beint við að ég tæki að mér að halda með Finnlandi.

Ég var alveg sátt við úrslitin, serbneska lagið virkilega fallegt þó að mér fyndist atriði hálfhallærislegt, 6 konur að leika "eitur í flösku". Hins vegar vorum við virkilega hneyksluð á því að RÚV skyldi hafa klippt á restina af keppninni til að sýna frá kosningavökunni. Það var ekki nema svona korter eftir og ég efast stórlega um að fólk hefði beðið mikinn skaða af því að bíða í 15 mínútur eftir að fylgjast með kosningatölunum sem voru ekki allar komnar fyrr en langt undir morgun. Ekki misskilja mig, ég er ekki að segja að Eurovision sé svona miklu merkilegra heldur en upplýsingar um hverjir muni stjórna landinu daginn eftir kosningar og ég fylgdist nú með kosningatölunum þegar ég var komin heim, en 15 mínútur til eða frá breyta varla miklu um gang mála!

~ ~ ~ ~ ~ ~ ~ ~ ~ ~ 

Svona í lokin á þessari færslu vil ég benda á nýjar myndir af Rögnu Björk , en eins og vanalega kemur hér vikuskammtur af myndum :)