Dagurinn í gær var nokkuð rólegur. Það fór fram alls herjar tiltekt og skipulagning á skrifborðinu mínu. Það kemur mér alltaf jafnmikið á óvart eftir svona tiltektir hvað það er í raun og veru stórt ;)
Um kvöldið horfði ég svo á The Beautician and the Beast sem reyndist vera jafnléleg og ég óttaðist. Af hverju tók ég hana þá, gætuð þið spurt? Jú, söguþráðurinn heillaði mig svo ég ákvað að gefa henni loksins séns þrátt fyrir að Fran Drescher leiki aðalhlutverkið. Í ljós kom svo að hún fór ekkert alltof mikið í taugarnar á mér. Það gerði hins vegar hinn myndarlegi Timothy Dalton sem pirraði mig óendanlega fyrir lélegan leik. Skil ekki hvað hann var að spá að taka að sér þetta hlutverk. En sem sagt, sá grunur sem læddist að mér árið 1997 (þegar myndin kom út) um að hún væri léleg reyndist á rökum reistur. En verður maður ekki að gefa hlutunum séns? :)

Í morgun sat ég síðan í 15 mínútur fyrir utan Videohöllina að bíða eftir að geta spilað lélegu myndinni áður en ég gat lagt af stað á Selfoss. Videohöllin er nefnilega ekki með sömu gæðaþjónustu og Laugarásvideo, þ.e.a.s. að hægt sé að skila myndum gegnum lúgu meðan videoleigan er lokuð.

Á Selfossi var ég strax sett í vinnu ;) Við mamma fórum yfir á hið nýja heimili systur minnar og Kjartans þar sem hjálpuðum til við að þrífa, taka upp úr kössum, flytja húsgögn og skipta okkur almennt af :) Gekk allt eins og í sögu. Uppáhalds krílin mín birtust svo upp úr miðjum degi eftir pabbahelgina. Held ég hafi ekki séð þau síðan.....ja ég veit eiginlega ekki síðan hvenær. Alla vega orðið alltof langt síðan.
En sem sagt, það verður gaman að heimsækja Guðbjörgu og Kjartan þegar þau verða búin að koma sér fyrir :) Fínt hús sem þau eru komin í.

Guðbjörg pantaði handa okkur pizzu svo að kjúklingurinn sem mamma ætlaði að elda í gær, og svo í kvöld varð að bíða. Hún eldaði hann síðar í kvöld og við fengum okkur af honum núna rétt áðan. Já, það er ekki á hverjum degi sem maður hámar í sig nýeldaðan kjúkling með BBQ-sósu rétt fyrir miðnætti.

Það besta við helgina er að hún er ekki búin ennþá. Vetrarfríinu lýkur ekki fyrr en eftir morgundaginn svo ég get enn einu sinni sofið út á morgun. Æ, hvað það er nú ljúft! :)

Bjarni og Unnur eru búin að setja sínar Halloween-myndir á netið og þar var m.a. þessi ágætis mynd af okkur Jóa ásamt Loru. Ég held að Unnur hljóti að vera kraftaverkaljósmyndari, henni tókst að ná mynd af mér með opin augu! Það gerist ekki oft!