Skreiddist fram úr rúminu rúmlega hálfellefu í morgun. Ágætt að vera stundum svolítið latur ;)  Þegar ég loksins nennti að klæða mig réðst ég á fataskápinn og raðaði svo fínt inn í hann að hann lítur nú út fyrir að vera tómur. Síðan byrjaði þvottadagsfjörið og ég þvoði nokkrar vélar í dag.

Kl. fjögur fórum við Jói í fermingarveislu hjá frænku Jóa. Alltaf gaman að koma í góða veislu, hitta gott fólk og fá góðar veitingar :) Það skemmdi ekki fyrir að við Jói unnum bæði happdrættisvinning, hann klippingu og ég lítið páskaegg.

Í kvöld langaði mig skyndilega að horfa á Harry Potter og viskusteininn og stakk DVD-diskinum mínum í tækið. En ekkert gerðist. Eftir að hafa prófað fleiri diska komumst við Jói að því að fínu DVD/video-græjurnar okkar eru bilaðar líkt og fleiri tæki hér á heimilinu. Alltaf svo gaman að fara með biluð tæki í viðgerð og borga stórfé fyrir! :( En þar sem ég var nú komin í stuð fyrir Harry Potter og búin að hafa fyrir því að poppa í potti og búa til sódavatn með SodaStream-tækinu (sem hefur ekki enn tekið upp á þeim leiða ósið að bila) þá kom ég mér bara þægilega fyrir með Harry Potter bók nr. 3.