Við Jói skruppum í morgun inn í Kringlu þar sem við gerðum stórinnkaup í Bónus og fluttum viðskipti okkar frá Landssímanum yfir í Íslandssíma. Vonandi fara internetvandræði okkar nú að minnka. A.m.k. mun ég þakka mínum sæla að þurfa ekki að ræða framar við gáfumennin í þjónustuveri Landssímans!

Við systurnar skemmtum okkur í Smáralindinni í dag og kvöld en mér tókst að lokka Guðbjörgu í bæinn í dag ;) Við byrjuðum á því að rölta milli búða Smáralindarinnar, snæddum síðan á Pizza Hut og fylgdumst með því þegar Volkswagen Golf/Polo var dreginn á afturendanum upp í loft í Vetrargarðinum og að lokum skelltum við okkur á Maid in Manhattan í lúxussal Smárabíós. Ég veit vel að ég var að borga mig aftur á sömu mynd og síðast (og í þetta skiptið í lúxussal...) en þetta er yndisleg mynd sem ég gæti alveg séð nokkrum sinnum í viðbót. Svo er það nú ekki á hverjum degi (eða hverju ári...) sem við systurnar förum saman í bíó þannig að því ekki að hafa þetta bara virkilega flott og láta fara vel um sig í lúxussalnum :)
Ég er enn agndofa yfir hvað Ralph Fiennes er myndarlegur og sexý í þessari mynd. Væri ekki einhver til í að gera rómantíska mynd með báðum sætu bræðrunum? Það yrði sko mynd sem ég gæti séð oftar en einu sinni og oftar en tíu sinnum... ;)