Byrjuðum daginn á hjólatúr í gegnum Laugardalinn, framhjá fyrrum heimili okkar á Kambsveginum, aftur í gegnum Laugardalinn og heim.
Við ætlum að gera hjólatúrana okkar að föstum lið á laugardögum. Auðvitað kemur alveg til greina að fara oftar út að hjóla ;) en planið er að fara a.m.k. alltaf á laugardögum.
Spurning hvert við ættum að fara næsta laugardag? Vonandi verður sól þá, mér finnst ekki eins skemmtilegt að hjóla í rigningu.

Seinna um daginn fórum við á aðalsafn Borgarbókasafnsins, skiluðum síðasta mánaðarskammti af bókum og tókum nýjan skammt. Ég fann fullt af Chicklit-bókum og er himinlifandi kát.

Um kvöldið ákváðum við að panta fríu pizzuna sem við eigum inni hjá Pizza Hut eftir vesenið um daginn. Einhverra hluta vegna varð ég ekkert rosalega undrandi yfir því að Pizza Hut kannaðist ekkert við málið. Inneignin sem átti að vera skráð í tölvukerfið fannst hvergi og vandræðaleg stelpan sem ræddi við mig í símann sagðist ekki mega gefa mér pizzuna og benti mér á að ræða við skrifstofuna á mánudaginn. Ísskápurinn okkar bauð ekki upp á mikið og við vorum búin að gíra okkur inn á pizzu svo ég tók eitthvað tilboð hjá þeim og ætla að hringja í skrifstofuna strax eftir vinnu á mánudaginn. Ég er ekki alveg á því að leyfa þeim að komast upp með þetta...!

Skellti Grease í tækið meðan ég nartaði í tilboðspizzuna sem ég endaði á að kaupa. Æðisleg mynd :) Ég spóla reyndar alltaf yfir heimskulega verndarenglaatriðið. Er einhver sem fílar það atriði, ég bara spyr...?