Kominn tími á bloggfærslu svo að það er víst best að byrja að pikka ;)

Á laugardaginn fórum við Jói í brúðkaup Óskars og Sóleyjar. Þetta var allt svo yndislegt, brúðhjónin hamingjusöm, tónlistin falleg, veislan glæsileg, veitingarnar ljúffengar og félagsskapurinn góður. Ég hitti meira að segja foreldra úr bekknum mínum, en eins og allir vita er Ísland svo lítið land að það telst nú ekki saga til næsta bæjar. Við Jói brögðuðum bæði á guðaveigunum sem í boði voru og skildum bílinn því eftir. Þurftum því að labba alla leið að sækja bílinn á sunnudeginum. Labbið tók merkilega lítið á enda stutt að fara yfir að safnaðarheimili Háteigskirkju héðan af Flókagötunni ;) Rúntuðum niður í bæ í góða veðrinu og fengum okkur morgunmat/hádegismat á Ingólfstorgi, slappa pizzusneið og gos.

Sunnudagurinn fór svo í sjálfboðavinnu fyrir skólann, það er nóg sem þarf að gera svona í skólalok.

Í dag var síðan síðasti kennsludagurinn þetta skólaárið. Ótrúlega skrýtin tilfinning þegar síðasta tímanum lauk. En ég þurfti þó ekki að kveðja krakkana strax, skólaslitin eru ekki fyrr en á miðvikudaginn.