Imba og Eric héldu sitt árlega Halloween-partý í gær. Það var svo ofboðslega gaman í partýinu þeirra í fyrra að ég er búin að spennt í heilt ár eftir að komast aftur. Partýið í ár var sko ekki síðra þó ég hafi reyndar verið í aðeins meiri erfiðleikum núna með að velja mér búning. Því þó ég eigi alls kyns undarleg föt niðri í geymslu sem nota má í alls kyns grímubúninga, þá passaði ég eiginlega ekki í neina þeirra þetta árið. Ég er nefnilega búin að bæta á mig nokkrum kílóum í kringum mittið. Samt ekkert til að hafa áhyggjur af, það tilheyrir nefnilega að gildna um miðjuna þegar maður á von á barni.

Ég er komin tæpa 5 mánuði á leið og því kannski kominn tími til að færa lesendum mínum fréttirnar - þ.e.a.s. ef ég á ennþá einhverja lesendur, ég hef ekki verið það dugleg að blogga undanfarið... :( Við erum búin að fara í 20 vikna sónarinn og það leit allt vel út, erfinginn virðist vera með allt sem til þarf, allt frá fingrum og yfir í fjörugt hjarta. Hann/hún hefur svo næstu 4 mánuði til að stækka og samkvæmt mælingum þá má eiga von á honum/henni í kringum 14. mars.

Mamma og Stefa verða líklega ánægðar með þetta, þær eru víst alltaf að kíkja á bloggið mitt og gá hvort ég sé búin að kjafta frá ;) Nú skal ég líka reyna að taka mig á og vera duglegri að blogga :) 

En sem sagt, það var pínu snúnara núna í ár að finna góðan grímubúning. Ég endaði á því að kaupa mér ljósa hárkollu og kórónu og útbjó hvítan borða sem á stóð "Miss Virginity (oops...)" og Jói fékk lánaðan landhelgisgæslubúning hjá Daða bróður sínum og var því sjóliðinn sem barnaði Ungfrú Hreinu Mey. Svo vorum við varla mætt í partýið þegar Jói fékk hugmynd að búningi næsta árs (sem er leyndó að sjálfsögðu! ;) ) svo að við getum strax byrjað að sauma - Imba, þú verður að halda áfram að bjóða okkur, þessi Halloween-partý ykkar eru með þeim skemmtilegustu sem ég fer í!!