Það var mikill fjöldi kennara sem safnaðist saman fyrir utan Karphúsið í morgun til að styðja við bakið á samninganefndinni okkar fyrir fundinn kl. 9. Vonandi nægur fjöldi til að sýna launanefnd sveitarfélaganna að okkur er alvara. Um kl. 8:50 fengum við svo óvæntan liðsauka. Breiðfylking kennaranema undir fána Stúdentaráðsins kom fílefld inn á planið við Karphúsið og til að veita okkur stuðning. Það var stórkostleg sjón sem lét engan ósnortinn.
Myndir frá morgninum eru á kennarar.is.

Eftir ræður Ólafs Loftssonar og Eiríks Jónssonar örkuðum við niður í bæ og fjölmenntum fyrir framan ráðhúsið til að afhenda borgarstjóra yfirlýsingu. Hann reyndist ekki vera á landinu. Formaður fræðsluráðs var heldur ekki á staðnum. Hann var ekki á landinu.
Frá ráðhúsinu hélt gangan áfram og nú var haldið að menntamálaráðuneytinu til að afhenda menntamálaráðherra yfirlýsingu. Við urðum auðvitað mjög hissa að heyra að hann var ekki á landinu. Þá var planið að afhenda ráðuneytisstjóra yfirlýsinguna. En viti mann, hann var ekki á landinu heldur. Merkilegt að þetta fólk sem vissulega ber ábyrgð þegar kemur að menntamálum í landinu skuli vera erlendis meðan ástandið er eins og það er...

Að lokum gengum við aftur yfir í Borgartúnið og fórum í verkfallsmiðstöðina. Engar fréttir bárust hins vegar yfir götuna úr Karphúsinu því enn var fundað. Vonandi veit það á gott að fundurinn skuli hafa staðið yfir frá kl. 9 til 16:30 í dag... vona það alla vega.