Mamma, Guðbjörg, Karlotta og Oddur komu í aðventuheimsókn í dag og fengu piparkökur o.fl. enda fyrsti sunnudagur í aðventu í dag.
     Fleiri heimsóknir bárust þegar líða fór á daginn en Haukur kom til kíkja á vaskinn okkar sem ákvað í gær að segja upp því hlutverki sínu að hleypa niður vatni. Haukur kíkti á vatnslásinn og rörin sem liggja inn um allt þak og komst að þeirri niðurstöðu að meiriháttar vandamál væri á ferðinni. Rörin öll stífluð og allt í skralli. Nú bíðum við bara eftir að fá pípara í málið og burstum tennurnar í baðkarinu eða eldhúsvaskinum á meðan. Gaman gaman...
      Á milli heimsókna og viðgerða æfði ég mig í að reikna fyrir aðferðafræðina. Mér var farið að ganga illa að einbeita mér að Læsisprófinu því aðferðafræðiskrímslið hékk alltaf á öxlinni á mér. Svo ég ákvað að reikna smá til að friða skrímslið og samviskuna og held svo áfram að glugga í Læsið á morgun. Aðventan sem tími jólaundirbúnings og gleði...? O nei, ekki fyrr en 11. desember. Þangað til mun hún einkennast af misáhugaverðum skólabókum og stífluðum rörum!