Hrafnhildur Ragnarsdóttir kynnti fyrir okkur froskasögur í Þróun máls og málnotkunar í dag. Froskasögurnar eru hluti af tilraun sem hún gerði á frásagnarhæfileikum barna (og fullorðinna). Hún lagði fyrir þau froskasögu í myndum eingöngu og fengu börnin að fletta í gegnum bókina áður en þau áttu svo sjálf að segja sögu bókarinnar. Í tímanum fengum við að fletta í gegnum froskabækurnar, lesa texta barna sem höfðu sagt sögu myndanna og fengum m.a.s. að sjá 3 barnanna segja frá á myndbandi. Munurinn á milli barna á sama aldri var ótrúlegur og það var merkilegt að sjá hvað þau sögðu ólíkt frá. Vonandi fáum við að kynnast fleiri svona spennandi verkefnum á námskeiðinu í vetur.
     Mér (og fleirum) finnst verst hvað tímasetningin á þessu námskeiði er léleg. Við erum frá 12:25 til 16:00 á föstudögum og ég get alveg sagt ykkur það að þó efnið sem við erum að fara í sé áhugavert þá er einbeitingin löngu flogin út um gluggann fyrir kl. 15:00 og þá er heil kennslustund eftir! Mikið hefði verið indælt að geta skipt námskeiðinu í tvennt og við hefðum verið í 2 kennslustundir í einu, tvisvar í viku. Þegar drögin að næstu stundatöflu verða gerð opinber þá bara verðum við á yngri barna sviðinu að mótmæla ef það á einu sinni enn að setja okkur í stór námskeið í 4 kennslustundir í senn á föstudagseftirmiðdögum!