Fór í jólagjafaleiðangur inn í Kringlu í dag en fann reyndar ekkert. Mér fannst mjög ánægjulegt að sjá hvað það eru komnir margir pakkar undir jólatré mæðrastyrksnefndar í Kringlunni. M.a. rakst ég á tvær ca. 10 ára gamlar dömur sem höfðu farið með vasapeningana í Ótrúlegu búðina og keypt gjöf til að setja undir tréð. Hvet ég alla til að kaupa litla gjöf, pakka inn og stinga undir tréð - sjáum til þess að allir fái jólagjöf!
  Kvöldið fór svo í bakstur. Sönn húsmóðir verður að sjálfsögðu að baka fleiri en tvær sortir af smákökum og fann ég mér því uppskrift að súkkulaðibitakökum til að baka í kvöld. Uppskriftin virtist ekki stór en deigið ætlaði aldrei að verða búið! Útkoman var rétt tæplega 250 kökur. Ætli það taki ekki allt næsta ár að klára þær?
   Þegar deigið endalausa var allt saman bakað skreytti ég piparkökurnar og eru þær nú flestar orðnar ósköp litríkar og dúllulegar. Ég skildi nokkrar eftir óskreyttar þar sem mörgum fjölskyldumeðlimum finnst það mun betra.
   Síðustu orkudroparnir fóru loks í að staulast niður í kjallara til að hengja upp þvott úr þriðju þvottavél dagsins.
   Nú ætla ég svo að skríða upp í rúm, enda orðin örmagna eftir langan dag.