Reyndi í dag að hringja í fólkið á Flókagötunni til að fá málin á ísskápshólfinu en númerið var ótengt. Mér datt í hug að hringja í fasteignasalann og gá hvort menn þar á bæ vissu eitthvað um staðsetningu Flókagötufjölskyldunnar. Þá fékk ég þær gleðilegu fréttir að þau væru búin að tæma íbúðina og að lyklarnir biðu okkar hjá fasteignasalanum. Ef það væri eðlisfræðilega hægt hefði ég faðmað fasteignasalann í gegnum símann en í staðinn dansaði ég bara stríðsdans í eldhúsinu eftir að ég lagði á. Samt las ég nú greinarnar tvær í "Raddir barnabókanna" áður en ég fór og náði í lyklana (svo góð stelpa, svíkst sko ekkert undan því að læra...ehemm...). Við Jói kíktum svo á tóma heimilið okkar í smástund. Annars sé ég Jóa nú mest lítið þessa dagana, hann er að vinna að lokaverkefni í HR og býr eiginlega í skólanum, kemur vanalega heim um 4 á nóttunni. En um helgina verður hann búinn að skila og ég fæ smá öndunarpásu frá próflestri þannig að þá getum við kannski fagnað þessu almennilega með því að ráðast til framkvæmda í höllinni.