Ekki gerði ég mér grein fyrir því að bílstjórar sem aka með farþega, svo við tökum sem dæmi rútubílstjóra, væru undanþegnir því að þurfa að nota handfrjálan búnað á GSM-símann sinn við akstur. Hefði ég haldið að reglan væri jafnvel enn mikilvægari fyrir þessa bílstjóra því þeir eru yfirleitt með mun fleiri mannslíf í bifreið sinni en aðrir. En sem sagt, eftir að hafa horft á bílstjórann í rútunni til Selfoss í dag spjalla í gemsann sinn með aðra hönd á stýri ákvað ég bara að kíkja í draumalandið meðan á ferðinni stæði og svaf mestalla leiðina austur. Gleymdi síðan að punkta niður bílnúmerið þegar ég fór úr rútunni.

Alltaf gaman að koma á Selfoss til mömmu. :)

Ákvað seint í gærkvöldi að það væri upplagt að skella sér á Selfoss um helgina, slappa svolítið af og fá bollukaffi hjá mömmu. Kíkti í snatri á heimasíðu BSÍ og sá að fyrsta rúta var áætluð kl. 8:30 og sú næsta 12:30. Til að nýta daginn sem best ákvað ég auðvitað að taka 8:30 rútuna þó ég þyrfti að rífa mig fram úr fyrir allar aldir og það um helgi. Uppgötvaði ekki fyrr en ég stóð fyrir framan lokaða og myrkvaða miðasöluna á BSÍ að 8:30 rútan er bara á virkum dögum. Gaman gaman. Ég sit því hér og læt mér leiðast við að spila tölvuleiki á netinu meðan ég bíð eftir að klukkan verði 12:30...