Yours truly er komin heim frá London ;) svo nú getið þið farið að fylgjast með mér á ný. Ég held ég fari nú ekkert að pota allri ferðasögunni hérna á bloggið. Þegar ég verð komin með ferðamyndirnar úr framköllun og finn tíma til að skanna þær inn, þá set ég þær að sjálfsögðu á heimasíðuna og skrifa ferðasöguna við.

Þó verð ég að segja ykkur strax frá hápunkti ferðarinnar síðastliðið þriðjudagskvöld þegar ég hitti Brian May, gítarleikarann í Queen, á hótelbarnum. Fyrir þá sem ekki vita þá hef ég verið forfallaður Queen-aðdáandi í meira en 10 ár og deili afmælisdegi með Brian May. Ég myndi gjarnan vilja segja að ég hafi haldið ró minni og spjallað við Brian á rólegan og yfirvegaðan hátt en ég hef frekar grun um að ég hafi jaðrað við að haga mér eins og ástsjúk grúppía. Guði sé lof að mér datt þó ekki í hug að segja honum frá kökunni á 14. afmælisdeginum mínum...hmmm ;) Um leið og ég fæ myndina af okkur Brian úr framköllun (vonandi heppnast hún vel og vonandi er ég ekki eins og fáviti á henni!!!) þá skelli ég henni á netið...og stækka eitt eintak upp til að hafa í gullramma í stofunni! ;) hehe