Eyddi deginum í leti, enda slöpp og sljó. Sem betur fer samt ekki með hita svo ég vona að ég nái þessum lasleika úr mér fyrir mánudaginn. Það er alla vega eins gott!

Fyrir utan að horfa á Litlu prinsessuna sem ég tók á video í gær, er ég búin að dunda mér í tölvunni að vinna í söngvasafninu mínu sem er nú komið á netið. Það er auðvitað langt frá því að vera tilbúið og verður það líkast til aldrei en ég ætla samt að skella því fyrir augu almennings strax með þeirri von að fá kannski athugasemdir sem hjálpa mér að gera safnið sem allra best.

Mér var að berast til eyrna að ónefndur skóli í Kópavogi hefði í vetur látið nemendur sína taka skriflegt próf í dansi. Þar áttu nemendur að lýsa dönsum með orðum, t.d. tvö skref til hægri, snúa til vinstri o.s.frv. Ég held ég hafi aldrei nokkurn tímann heyrt neitt jafn fáránlegt! Þetta slær m.a.s. út fáránlega tölvuprófið í MR sem við vorum látin taka skriflega á pappírsblaði án þess að hafa svo mikið sem eina tölvu í sjónmáli. Já, það er óneitanlega margt skrýtið í kýrhausnum!