Byrjaði daginn í sturtu og skolaði af mér leti gærdagsins. Það virðist hafa virkað því ég hef verið hörkudugleg í allan dag. Réðst fyrst til atlögu við óhreina tauið og fór þó nokkrar ferðir niður í þvottahús í dag að setja í vél, taka úr vél, setja í vél o.s.frv. Vann svo slatta fyrir Hrafnhildi Ragnars Prófessor en það er smám saman allt að vera tilbúið áður en námskeiðin hennar hefjast í næstu viku. Hristi svo saman í pizzadeig og bakaði tvær litlar pizzur handa okkur Jóa í kvöldmat.

Kristín og Gummi nutu einnig góðs af kröftum mínum í dag. Þau hafa verið gróflega vanrækt af minni hálfu síðan þau urðu til í huga mínum í sumar. Nú hef ég hins vegar gert góðan skurk í að klára persónulýsingar þeirra og annarra en í þetta skiptið ætla ég nefnilega að skipuleggja mig vel áður en ég byrja að skrifa sjálfa söguna. Dómsmálaráðuneytið og Dagmar Þórisdóttir veittu mér ómetanlega aðstoð við að finna fjöldann allan af nöfnum á ýmsar sögupersónur.