Táknmálsnámskeiðinu lauk í dag. Við lokkuðum kennarann okkar með okkur niður á bókasafnið þar sem við höfðum sett upp hlaðborð með smákökum, vínarbrauði, kakó og kaffi. Fyrst unnum við verkefni; æfðum fingrastafrófið og þóttumst vera að leira. Það verður gott að fá þriðjudaga og fimmtudaga lausa til að geta notað í undirbúning kennslunnar en á hinn bóginn er slæmt að missa þennan vettvang til að æfa táknmálið. Ég þarf að vera duglegri að reyna að tjá mig við Eyrúnu, Ragnheiði Söru og hinar á táknmáli.....

Fór í leiðangur í dag að kaupa hráefni í jólaföndrið hjá 1. SJO og 1. HO. Fékk frábæra þjónustu í Rúmfatalagernum í Holtagörðum. Hann Friðrik Örn gaf sér góðan tíma til að aðstoða mig við vöruleitina, hringdi fyrir mig nokkur símtöl yfir í Rúmfatalagerinn í Skeifunni og var bara virkilega almennilegur í alla staði :) Og það mitt í jólaamstrinu. Frábært!
     Ég hitti og sá fullt af fólki sem ég þekki í leiðangrinum og sá einnig fólk sem ég þekki ekki en þykist eins og allir Íslendingar þekkja. Edda Björgvins var í Rúmfatalagerinn en ég gleymdi alveg að haga mér eins og sannur Íslendingur á að gera þegar hann hittir "fræga fólkið", þ.e.a.s. ég punktaði ekki hjá mér nákvæmlega hvað hún var að kaupa svo ég gæti bloggað um það. Hmmm...ég er greinilega ekki að standa mig ;)
     Í bílnum á leiðinni milli allra búðanna sem ég fór í reyndu nokkrir ökumenn að aka mig niður. Alltaf jafngaman í umferðinni...

Við Jói tókum svo skyndiákvörðun um að skella okkur í tíubíó á Finding Nemo. Einu orði sagt stórkostleg mynd. Persónurnar sniðugar og flott gerðar, litirnir magnaðir og ég hló svo mikið að ég er enn að þurrka tárin. Mæli með henni og set hana beint á DVD-óskalistann minn þegar hún kemur út hérna.
     Við keyrðum Bústaðaveginn heim úr bíóinu því ég vildi sjá jólahúsið ógurlega. Við fundum það hins vegar ekki og drógum þá ályktun að annað hvort væri jólaskreytingamaðurinn mikli ekki búinn að kveikja (sem mér finnst ótrúlegt miðað við að það er kominn desember) eða að hann sé fluttur (sem þýðir að við verðum að finna út hvert hann fór svo við getum séð skreytingarnar).