Tókum forskot á bolludaginn í dag. Mamma bakaði vatnsdeigsbollur sem við fylltum síðan af karamellubúðingi og rjóma og belgdum okkur síðan út þar til við stóðum á blístri.
Sá í fréttunum á RÚV að fleiri voru að svindla á bolludeginum, litið var inn í bakaríið í Austurveri þar sem ýmsir Reykvíkingar voru að næla sér í bollur. Fannst reyndar fréttakonan einstaklega ósmekkleg og dónaleg en hún gekk á fólk og spurði hvort það hefði ekki áhyggjur af línunum út af öllum þessum bollum. Grannvaxin kona sem varð fyrir barðinu á henni varð skiljanlega hálfvandræðaleg yfir dónaskapnum og sagðist ekki halda að hún þurfi að hafa svo miklar áhyggjur þó hún fái sér nokkrar bollur. Alltaf svo vandaður fréttaflutningur nú til dags...eða hitt þó!