Gaman að hitta stelpurnar í saumaklúbbnum hjá Lindu í gær. Verst hvað við vorum tiltölulega fáar en það verður að hafa það. Á einum (eða fleiri hehe) tímapunkti þegar umræðurnar voru orðnar ískyggilega barn- og fæðingavænar, þá áttaði ég á mig að ég var eina manneskjan af 6 viðstöddum sem ekki er móðir eða er að verða það innan örfárra mánaða. Það gerði svo sem ekkert til, eftir þrjú ár í Kennó ætti maður að fá sérstaka diplómu í umræðum um börn og barneignir.

Unnsteinn frændi er algjör hetja. Hann er búinn að sitja fyrir utan Mál og menningu frá því kl. 14 í dag (í næstum 10 klukkutíma) sveipaður skikkju og með kringlótt gleraugu. Hann verður nr. 5 til að fá eintak af nýju Harry Potter bókinni. Og ef Mál og menning heldur sig við það sem þeir sögðu í dag, þ.e. að hver og einn megi kaupa tvö eintök, þá er hann einnig að fara að kaupa eintak fyrir elsku frænku sína. Ég ætla að skjótast á eftir og hitta hann fyrir utan og gá hvort þetta gekk. Ef hann nær að kaupa eintak fyrir mig (sem ég vona heitt og innilega....!) þá verður líklega lítið sofið á mínum helmingi rúmsins í nótt... ;)