Skutlaði Jóa í vinnuna í morgun, fyrsti dagurinn hans í Bílanaust í dag og líkaði bara vel skilst mér :)

Ég gleymdi að segja frá því í gær að mér áskotnaðist þessi líka fíni gítar. Á húsfundinum í síðustu viku voru tónlistarmenn á ýmsum hæðum hússins að velta fyrir sér hvort það heyrðist mikið í hljóðfærunum milli hæða (þrjú píanó, trompet, munnharpa og gítar í húsinu svo eitthvað sé nefnt). Eitthvað var minnst á gítara svo ég nefndi að ég hefði reynt að læra á gítar og langaði mikið til að kunna vinnukonugripin og geta spilað. Í gær þegar við Jói komum heim kom Ágústa út í dyr með stóran bláan poka og ég velti því fyrir mér hvort hún ætlaði að biðja okkur um að tjalda fyrir sig úti í garði. En pokinn innihélt ekki tjald heldur strengjalausan gítar sem Ágústa sagði að væri að rykfalla hjá sér. Hún vildi endilega gefa mér hann svo ég gæti spilað og sungið með framtíðarnemendum mínum. Ég er að sjálfsögðu himinlifandi og ætla að drífa í því að setja nýja strengi og kaupa mér svona gítarnögl. Svo er bara að grafa upp gömlu kennslubókina og reyna að ná helstu gripunum. Ef þetta gengur ekki svona á eigin spýtur þá er ég nú með einn gítarleikara í huga til að kvabba á til að kenna mér...

Elísabet kom í heimsókn til mín í kvöld og í samráði við hana hringdi ég í Magga megabílstjóra og bauð sjálfri mér í partý næsta föstudag. Maður lætur nú ekki skilja sig útundan enda á ég nú heilmikið inni hjá Magga og co ;) hehe Já, við Elísabet ræddum heilmikið saman og horfðum á Maid in Manhattan. Fínt kvöld og gaman að hittast :)