Fór í hádeginu í dag og hlýddi á ráðagerð skemmtinefndarinnar. Þau komu með skemmtilega hugmynd sem verður pottþétt gaman að framkvæma. Æfingar hefjast um helgina enda ekki seinna vænna þar sem árshátíðin er eftir aðeins 24 daga.

Kristján kom á skemmtinefndarfundinn til að minna á fyrirlestur VR á Framadögum sem standa yfir núna. Þeim fyrirlestri var frestað lítillega svo við sem vorum á skemmtinefndarfundinum gætum mætt. Við Berglind kunnum því eiginlega ekki við annað en að mæta og drifum okkur yfir í Bratta til að hlýða á fyrirlesturinn. Þegar þangað var komið sáum við að við tvær skipuðum helming áheyrendahópsins, hinn helmingurinn voru Kristján og Gunni. Frekar vandræðalegt...ég get ekki sagt annað. En maðurinn og konan frá VR, sem voru tilbúin með PowerPoint show og önnur gögn létu þetta ekkert á sig fá og gáfu okkur fjórum bara styttri útgáfu af fyrirlestrinum.

Leikfimitími nr. tvö gekk þó nokkuð betur en nr. eitt að mínu mati - enda yours truly búin að kaupa sín eigin lóð í Europris og gleymdi ekki að taka með sér vatn í þetta skiptið ;) Þó nokkur fjölgun í hópnum síðan síðast og var ég ekki lengur ein í yngsta flokknum.

Fékk e-mail í morgun þar sem varað er við boltalöndum MacDonalds vegna stráks sem á að hafa dáið eftir að hafa stungið sig á sprautunál í einu slíku boltalandi. Þó leiksvæði á skyndibitastöðum séu augljóslega ekki alltaf þau hreinustu eða öruggustu þá er þessi tiltekna saga, ásamt annarri svipaðri sem tengist skröltormum, sem betur fer ekki sönn.
Seinni sagan er rædd á mjög áhugaverðri síðu sem flettir ofan af og staðfestir ýmsar svona flökkusögur (Urban Legends).