Himinninn var fallegur í morgun þegar ég var á leiðinni í sörubaksturinn. Ég mátti til með að stoppa bílinn og taka þessar myndir. Gaman að fyrsti sunnudagurinn í aðventunni skuli vera svona fallegur. Vona að það þýði að desember verði allur fallegur :)

Sörubaksturinn gekk vel og ég kom heim með tæplega 70 fallegar (og góðar :p nammi namm) sörur. Sniðugt að geta bakað þessar flóknu smákökur undir handleiðslu heimilisfræðikennara (og fleiri kennara) í rúmgóðri heimilisfræðistofunni. Efast um að sörurnar hefðu heppnast jafnvel ef ég hefði ætlað að baka þær hjálparlaust í pínulitla eldhúsinu mínum. Björn, fyrrum smíðakennari, var glæsilegastur í bakstrinum, ekki amalegt að hafa svona flottan herramann með í fjörinu.

Betraból fékk síðan smá dekur eftir að ég kom heim. Við Jói dunduðum okkur við að taka til og snurfusa. Ég náði reyndar ekki að setja upp jólaseríurnar eins og ég hafði ætlað mér en aðventuljósin eru komin upp :)

Í kvöld bakaði ég svo tvöfalda uppskrift af Geirakökunum til að hafa með mér í D-bekkjarsaumaklúbbinn í vikunni. Bjarni og Unnur litu við meðan á bakstrinum stóð og smökkuðu afraksturinn af fyrstu bökunarplötunni.