Á kennarastofunni í dag biðu bunkar af blöðum sem við áttum að dreifa til nemenda ..þ.e.a.s. ekki allra nemenda heldur aðeins helmings þeirra. Annað kynið átti að fá blöð en hitt ekki. Þetta var skemmtileg og flott glanspappírsmynd af íslenska kvennalandsliðinu í fótbolta sem allir hefðu haft gaman af að fá, ekki bara stelpurnar í bekknum. Svo ég sleppi þessu bara og ég ætla ekki að dreifa blöðunum. Ég sé fyrir mér viðbrögðin sem hefðu komið ef þetta hefði verið mynd af karlalandsliðinu og ég hefði bara átt að dreifa henni til strákanna. Þá hefði þetta verið álitið gróft ójafnrétti. Af hverju er þetta eitthvað öðruvísi þegar dæmið snýst við? Þar fyrir utan þá er þetta einnig bílaauglýsing og ég sé mig ekkert sérstaklega knúna til að annast dreifingu á ókeypis auglýsingapésum.

Í tölvutímanum í dag lærðum við að það þarf rafmagn til að geta unnið í tölvum (og þá er ekki átt við fartölvur). Við lærðum það með "hands-on"nálgun.... Meðan við sátum í myrkrinu kenndi ofurtölvukennarinn okkur síðan skemmtilegt lag, þannig að við lærðum nú ýmislegt! :)