Var að vinna til kl. tvö í dag og svo skemmtilega vildi til að mamma var í bænum að láta sér leiðast svo við skruppum saman á Laugaveginn og svo inn í Kringlu. Hefðum kannski verið lengur á Laugaveginum ef við hefðum getað verið löglegar og borgað í stöðumæli en hvorug okkar var með klink á sér. Væri það mjög flókið að setja fítus í stöðumælaboxin þar sem maður getur valið um að borga með debetkorti? Þá er ég að meina boxin þar sem maður fær miða til að setja í bílinn, ekki gömlu "snúningsmælana" sem þarf reyndar ekkert að snúa lengur...

Fór einnig á Aðalbókasafnið í Grófarhúsinu til að skila bókum og kom út með 20 bækur. Þar á meðal voru nokkrar sniðugar bækur sem gætu nýst fyrir kennsluna í haust. Held það sé kominn tími til að maður setji sig í gír fyrir veturinn...

Mikið innilega er ég sammála mömmu með Árna Johnsen! Ég held að maðurinn sé ekki alveg að gera sér grein fyrir að hann var sendur í fangelsi fyrir að fremja glæp og hluti af refsingunni sem felst í fangavistinni er að hann má ekki fara á útihátíðir og til að stjórna fjöldasöng. En það virðist gjörsamlega fyrir ofan hans skilning. Kannski einhver ætti að setjast niður með hinum fyrrverandi alþingismanni og útskýra fyrir honum hvernig lögin virka (og þá er ég ekki að meina sönglögin!) eða þ.e.a.s. hvernig þau eiga að virka.