Ég sat heima hjá mér í mesta sakleysi og hlustaði á óhljóðin í veðrinu. Veðurhljóð magnast vanalega heilmikið hérna í risíbúðinni okkar svo ég gerði mér nú enga grein fyrir að þetta var ekki bara venjulegt rok heldur rokna stormur. Þangað til ég leit út og sá að grillið hafði fokið opið. Fór út til að loka því og komst að því að lokið var brotið af og hékk á bláþræði. Reyndi að binda lokið svo það fyki ekki, en þá fauk svalahurðin upp með offorsi og festing á henni brotnaði og braut upp úr hurðinni. Sem betur fer kom Jói svo fljótt heim og við björguðum farlama grillinu inn áður en það tókst á loft og flaug út í buskann.