Hér með lýsi ég yfir frati á Pizza Hut!
Frábærar pizzur en ömurleg þjónusta.
Ég hringdi í skrifstofuna þeirra í dag til að kvarta yfir öllu veseninu undanfarið.
     Fyrst ræddi ég við konu sem sagðist myndu setja inn inneign fyrir 1100 kr., verðið sem ég borgaði upphaflega. Málið er samt það að sú pizza sem ég keypti hjá þeim í upphafi var stór pizza, þó hún hafi akkúrat kostað 1100 kr. daginn sem ég keypti hana. Ég útskýrði það fyrir konunni í símanum að ég teldi mig eiga rétt á inneign fyrir stórri pizzu, hvað þá eftir að hafa lent í því á laugardagskvöldið að þurfa að borga fullt verð fyrir það sem ég pantaði þar sem inneignin hafði ekki ekki einu sinni verið sett inn. Hún svaraði á móti að ef ég hefði keypt peysu á útsölu þá hefði enginn farið að borga mér 1000 kr. með peysunni. Veit ég vel. En ég vil líka vera viss um þegar ég kaupi peysu á útsölu að afgreiðslukonan láti mig ekki hafa buxur í staðinn. En það hafðist ekkert meira upp úr samtalinu svo ég kvaddi og var enn reið enda hafði ég ekki fundið fyrir snefil af þjónustulund hinum megin á línunni.
     Svo ég hringdi aftur og fékk nú samband við framkvæmdastjórann. Hefði alveg eins getað sleppt því. Held ég hafi sjaldan rætt við jafndónalegan mann. Hann hló að mér þegar ég var búin að segja honum hvað málið væri, talaði niður til mín allt símtalið með því að ávarpa mig með "Sigurrós mín" og sagði að þetta væri nú í rauninni mér sjálfri að kenna þar sem ég hefði átt að kíkja sjálf í kassann áður en ég fór með pizzuna heim. Ókei, auðvitað hefði það sparað heilmikið vesen en einhverra hluta vegna leggur maður það í vana sinn (guð má vita hvers vegna!) að treysta veitingastöðum þegar maður leggur inn pöntun. Hann sagði líka að ég hefði nú fengið vitlausu pizzuna fría og ætti ekki að vera að kvarta. Það virtist ekki koma málinu við að ég hefði með glöðu geði skipt strax ef þeir hefðu bara komið með réttu pizzuna til mín, ég veit margt skemmtilegra en að fara margar ferðir út á Pizza Hut. En þá fyrst var honum skemmt; "heldurðu virkilega að við förum að keyra út um allan bæ með pizzu fyrir þúsund krónur? Bensínið á bílinn kostar meira!"
     Ég lét hinn hrokafulla framkvæmdastjóra vita að ég myndi nýta mér þessa 1100 kr. inneign og færa flatbökuviðskipti mín annað í framtíðinni. Held honum hafi ekki getað verið meira sama.
     Þangað til Pizza Hut sér sig um hönd og færir viðskiptavini sína í fyrsta sæti fram yfir skyndigróða, þá mun ég hunsa þá og panta frekar á Dominos eða annars staðar. Það er heilmikil fórn fyrir mig að kveðja Pizza Hut pizzurnar því mér finnst þær svo góðar, en mér þykir það leitt, ég læt ekki koma fram við mig eins og fífl!