Húkkaði far með mömmu austur á Selfoss í gær. Amma og Ingi komu svo í mat í Sóltúnið og við áttum ósköp huggulega stund hérna saman. Alltof sjaldan sem maður sér þau.
Í dag erum við mamma svo búnar að flækjast fram og tilbaka í alls kyns skemmtilegum útréttingum. Ég skildi gleraugun mín eftir í gleraugnaverslun hér í bæ sem býður 20% afslátt á glerjum. Á von á þeim aftur í fyrramálið með auknum styrkleika. Það verður þvílíkur munur að fá réttan styrkleika í gleraugun. Og eftir að hafa ráfað um hálfsjónlaus í heilan dag þá verður þvílíkur munur bara að fá einhver gleraugu aftur... ;)
Við fórum út í Hveragerði þar sem ég keypti mér Miracle-diskinn með Queen í Álnavörubúðinni. Maður verður nú smám saman að passa upp á að bæta í safnið góða. Svo fórum við í Eden og fengum okkur ís. Í kvöld fengum við okkur svo að borða í hinum nýja skála í Þrastalundi. Virkilega huggulegt þó að mér finnist húsið sjálft að utan ekki passa almennilega við náttúruna.

Nú ætla ég hins vegar ekki að hripa hér meira niður enda sé ég varla á tölvuskjáinn. Ef þetta reynist vera morandi í prentvillum, þá leiðið þið það hjá ykkur í þetta skiptið, er það ekki bara? ;)