Við elduðum hakk með ananas, eplum og sveppum í kvöldmatinn í gær sem er svo sem ekki í frásögur færandi ef ekki væri fyrir laumusveppina.
Um leið og ég opnaði rammíslensku sveppadósina fannst mér sveppirnir ískyggilega gulleitir og útlitið minnti mig einna helst á austurevrópsku sparsveppina sem ég keypti einhvern tímann. Mér varð hugsað til fréttanna fyrir skömmu þar sem talað var um að reynt hefði verið að pranga útlendum sveppum í lélegum gæðum inn á neytendur sem íslenskri gæðavöru með því að líma íslenskan miða yfir þann útlenda.
Þannig að ég byrjaði strax að kroppa miðann af. Viti menn! Hvað haldið þið að hafi komið í ljós? Sveppirnir reyndust frá mun austlægari slóðum en miðinn sagði til um eins og sjá má á myndunum: Mynd 1 - Mynd 2
Þetta eru ekkert vondir sveppir, það er ekki málið. Það er nú bara einu sinni þannig að manni finnst lítið gaman að leyfa fólki að komast upp með það að hafa mann að fífli. Aldrei að vita nema ég fari á stúfana og geri eitthvað í málinu þegar um hægist í næstu viku. Þeir sem þekkja mig vita að það er alveg eins líklegt...  :)