Fór í Videohöllina fyrr í kvöld og náði mér í stelpumynd. Algjör B-mynd með fullt af öfga lélegum bröndurum en samt soldið sæt. Ekki eitthvað sem ég mun nokkurn tímann nenna að sjá aftur.
     Það er tvennt sem pirrar mig þegar ég bregð mér yfir í Videohöllina til að ná mér í eitthvað skemmtilegt að glápa á.
     Í fyrsta lagi þá sjá þeir enga ástæðu til að láta viðskiptavini sína vita hvað kostar að leigja hjá þeim. Ef ég vil fá einhverja hugmynd um verðið áður en ég reiði fram kortið og borga þá þarf ég alltaf að spyrja afgreiðslufólkið. Kannski væri auðveldara að hengja verðið upp á áberandi stað...? (Ef einhver hefur rekist á verðlista í Videohöllinni þá má sá hinn sami láta mig vita. Mér hefur alla vega aldrei verið bent á verðlista þegar ég bið starfsfólkið um að þylja upp verðlistann munnlega...)
     Annað sem truflar mig er reyndar atriði sem truflar mig á flestum ef ekki öllum vidjóleigum. Af hverju í ósköpunum er hvergi hafður sérstakur flokkur með rómantískum myndum fyrir svona væmnar, rómantískar sálir eins og mig? Af hverju eru þær alltaf flokkaðar með gamanmyndunum? Nú er sérstakur flokkur fyrir hryllingsmyndir, ekki eru þær flokkaðar með spennumyndunum....... af hverju er þá ekki hægt að hafa sérstakan flokk fyrir rómantískar myndir?!? Þegar ég er að leita mér að mynd um ástfangið fólk þá verð ég yfirleitt að grafa þær upp úr hópi mynda um karlmenn sem verða óléttir, fólk sem rennur á bananahýði eða breytist í geimverur eða górillur. Það segir sig nokkuð sjálft að það getur verið þreytandi.

En ég ætla nú ekki að kvarta meira. Sérstaklega eftir svona afkastamikinn og fínan dag í vinnunni. Við fengum loksins starfsdag í skólanum (í annað skipti frá skólabyrjun) og í þetta skiptið var þetta alvöru skipulagsdagur með aðeins einum stuttum fundi en ekki fræðslu- og fundadagur eins og síðast... Við settum niður fullt af hugmyndum og erum í góðum málum a.m.k. fram að næsta starfsdegi og raunar mun lengur :)

Hér má sjá mitt heimskort. Ég hef farið til 9 landa og samkvæmt þessu hef ég þar með heimsótt 4% af löndum heimsins. Eitthvað gefur kortið þó ranga mynd þar sem ég hef aðeins heimsótt brot af Bandaríkjunum og Kanada en fæ samt hálfa heimsálfu inn á kortið. Einnig virðist sem ég hafi heimsótt fjöldann allan af litlum eyjum út um allan heim, aðeins vegna þess að þær tilheyra öðrum löndum sem ég hef heimsótt.