Langþráð stund í kvöld. Loksins komið að nýrri Harry Potter mynd. Keypti miðana í forforsölu fyrir nokkru og geymdi þá í bankahólfinu í neðanjarðarbyrginu. Eða þeir voru á ísskápnum ;)
Mættum 55 mínútum áður en myndin byrjaði. Stóðum í 30 mínútur í þvögu (vorum sko ekki fyrst!) og sáum síðan auglýsingar í 25 mínútur. Það er mikið sem maður leggur á sig...
Myndin var vel gerð og flott, og í rauninni eins góð og svona stutt mynd upp úr svo langri bók getur orðið. Mikið vildi ég samt óska að það tíðkaðist að búa til 4-5 tíma langar myndir svo að hægt væri að gera söguþræðinum almennileg skil eins og bækurnar eiga skilið. En það er víst ekki líklegt að það gerist. Ég verð bara að sætta mig við að hafa myndirnar sem smá sjónrænan viðauka við gersemisbækurnar sjálfar.
Ætli ég endi þessa færslu ekki bara á því að vera leiðinleg og benda fólki á að fara ekki með of ung börn á myndina, vitsugurnar virðast mjög vel til þess fallnar að veita martraðir. Svo virðist einnig sem fleiri hættur leynist í bíósalnum, ein lítil dama var næstum köfnuð á sælgætismola, ældi á gólfið og pabbinn rauk með hana út.
Já, það var sko hasar í kvöld.