Ritlistarnámskeiðið hófst í kvöld undir leiðsögn og stjórn Rúnars Helga Vignissonar. Skemmtilegur og áhugaverður maður sem gaman er að hlusta á. Námskeiðið lofar góðu enda er stefnt að því að láta okkur þátttakendurna púla, leggja fram texta og fá á okkur gagnrýni. Einmitt það sem ég sækist eftir. Ef ég vildi fá hreinræktaða fyrirlestra um ritlist og skáldskap án nokkurs tækifæris til að leggja eitthvað til málanna sjálf, þá gæti ég allt eins fundið mér handbók um þessi málefni sem ég gæti lesið ein heima í stofu. Nú er bara spurningin hvort ég hef kjark til að leyfa þessum hópi ókunnugs fólks að sjá og gagnrýna texta eftir mig. Og enn stærri spurning, hvort ég hef kjark til að vera ég sjálf og skila inn því sem mig langar mest til að skrifa...